Tarehe 26 Oktoba 2026, Kata ya Mgombezi ilipokea ugeni maalumu kutoka YPM ukiongozwa na Mwenyekiti wa Kata hiyo, ukiwa na lengo la kufuatilia maendeleo, kutoa elimu, na kusikiliza changamoto zinazowakabili wanachama wa vikundi vya huduma ndogo za kifedha vinavyoratibiwa chini ya mwamvuli wa shirika la Youth Peacemakers (YPM).

Katika ziara hiyo, vikundi kadhaa chini ya YPM vilitembelewa na kujionea mafanikio na namna vinavyoendesha shughuli zao za kiuchumi:

1. Moria KKT: Kikianzishwa mwaka 2025 na kukutana kila Jumatatu (mara 4 kwa mwezi), kina wanachama 31 (wanaume 8). Kikiwa na mtaji wa Shilingi Milioni 7 na laki 9, wanachama wanachangia hisa ya Sh 2,000 na jamii Sh 1,000, huku wakipanga kuanzisha mradi wa ufugaji nguruwe.
2. Mshikamano: Kikiwa katika mchakato wa usajili kamili, kina wanachama 11 (wanaume 2), mtaji wa Shilingi Milioni 1, na huendesha mzunguko wa mwaka mmoja.
3. Jipemoyo: Kikundi kongwe kilichoanzishwa mwaka 2014, chenye wanachama 38 (wanaume 5) na mtaji mkubwa wa Shilingi Milioni 15. Kinamiliki mradi wa kukodisha viti 420 na huvunja mzunguko wake kila baada ya miaka mitatu.
4. Upendo na Vikundi Vingine: Vikundi vingine vya Upendo (vya siku tofauti za wiki) navyo vilionesha ushirikiano mkubwa na nidhamu ya kifedha.

Changamoto Zilizobainishwa

Licha ya mafanikio makubwa katika ujenzi wa mitaji na kumiliki akaunti za benki, ziara hiyo ilibaini changamoto kadhaa zinazohitaji ufumbuzi ikiwemo:

• Kutorejesha mikopo kwa wakati kwa baadhi ya wanachama.
• Masuala ya mahudhurio hafifu katika mikutano.
• Ukosefu wa uelewa wa kina wa baadhi ya taratibu za uendeshaji wa vikundi.

Maoni na Maombi ya Wanachama kwa Maendeleo

Wanachama walitoa maombi kadhaa ya kimkakati ili kuongeza tija, ikiwemo kuanzisha klabu za michezo na ligi ili kuleta ustawi wa pamoja, kutowawacha wanachama kwa muda mrefu, kuwashirikisha kwenye fursa za elimu (kama maonyesho ya Nane Nane), na kuletewa wataalamu wa kutoa elimu endelevu ya biashara.

Wataalamu walisisitiza kuwa kila mwanachama ana haki ya kujua taarifa zake za fedha na za kikundi kwa uwazi. Serikali ya Kata na uongozi wa YPM wameahidi kufanyia kazi changamoto hizo ili kuimarisha ustawi wa wananchi kiuchumi kupitia mfumo sahihi wa vikundi.